ស្រវឹងធ្លាក់ភ្នែកជិះម៉ូតូទៅបុកពីក្រោយរថយន្តចតស្ងៀមបែកក្បាលផុងលលាដ៏ស្លាប់ក្នុងថ្លុកឈាម
ស្រវឹងធ្លាក់ភ្នែកជិះម៉ូតូទៅបុកពីក្រោយរថយន្តចតស្ងៀមបែកក្បាលផុងលលាដ៏ស្លាប់ក្នុងថ្លុកឈាម
រាជធានីភ្នំពេញ ៖ បុរសម្នាក់បានបែកក្បាលផុងលលាដ៏ស្លាប់ភ្លាមៗនៅនឹងកន្លែងដោយសារតែស្រវឹងធ្លាក់ភ្នែកជិះម៉ូតូ MIO មួយគ្រឿងក្នុងល្បឿនលឿនជ្រុលទៅបុកពីក្រោយរថយន្តហ៊ីយ៉ាន់ដាយដែលចតស្ងៀមនៅចញ្ចើមផ្លូវយ៉ាងពេញទំហឹង កាលពីវេលាម៉ោង៤ និង៣០នាទីទៀបភ្លឺ ថ្ងៃទី១៦ តុលា ២០១៥ នៅលើបណ្តោយផ្លូវលេខ២៣០ ស្ថិតក្នុងសង្កាត់ផ្សារដើមគរ ខណ្ឌទួលគោក ។
បុរសដែលស្លាប់ឈ្មោះ មាស សុក្របូរមី អាយុ២៤ឆ្នាំ ស្នាក់នៅក្នុងសង្កាត់ទឹកល្អក់៣ ខណ្ឌទួលគោក ។
តាមប្រភពព័ត៌មានពីកន្លែងកើតហេតុគេបានឃើញបុរសម្នាក់ជិះម៉ូតូ យ៉ាម៉ាហា MIO មួយគ្រឿង ពណ៌ក្រហមលាយខ្មៅ ពាក់ស្លាកលេខភ្នំពេញ 1BE-0269 ជិះតាមបណ្តោយផ្លូវលេខ២៣០ ក្នុងល្បឿនយ៉ាងលឿន ហើយមានសភាពស្រវឹងជោកជាំ លុះមកដល់ចំណុចកើតហេតុដោយសារតែស្រវឹងខ្លាំងពេកក៏ជ្រុលទៅបុកជាមួយគូទរថយន្តហ៊ីយ៉ាន់ដាយ មួយគ្រឿង ពាក់ស្លាកលេខព្រះសីហនុ 3A-2551 ជារថយន្តដឹកបន្លែដែលម្ចាស់បើកមកចតស្ងៀមនៅលើចញ្ចើមផ្លូវចំពេញទំហឹងហោះទៅបុកក្បាលជាមួយរបាំងបើកគូទក្រោយបណ្តាលឲ្យបែកក្បាលផុងលលាដ៏ស្លាប់ភ្លាមៗនៅក្នុងថ្លុកឈាមយ៉ាងអណោចអធ័ម។
ភ្លាមៗនោះដែរសមត្ថកិច្ចបានមកដល់ចំណុចកើតហេតុ និងបានឆែករកអត្តសញ្ញាណរបស់បុរសនោះដើម្បីទាក់ទងទៅសាច់ញាតិឱ្យមកទទួលយកសព ចំណែករថយន្ត និងម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរចរណ៍ជើងគោកនៃស្នងការដ្ឋាននរគបាលរាជធានីភ្នំពេញ៕
